因為咩嘢"呃你嚟落"現象, 氣象局預測今年瓜拿大嘅冬天會比正常嘅暖. 舊年呢個時候多倫多經已落過雪, 但係今年到依家卻連冰都未落過一粒. 如果到咗十一月三十日都冇雪落嘅話, 就會破咗四十年前嘅記錄.

希望正如氣象局所料, 今年嘅冬天會和暖啲, 落少啲雪, 咁我就唔使成日留喺屋入面吽磨菇喇!

遍地紅葉, 秋天最好就係去郊遊, 順便追吓松鼠.

秋天經已喺九月廿二日偷偷到臨. 瓜拿大四季分明, 秋天一到天氣就開始轉涼, 呢排日間最高温度都係得嗰十零廿度咋! 近日啲松鼠好忙咁四出揾定糧食過冬, 而爹哋媽咪都經已攞定架生出嚟, 隨時準備耙落葉!

Nut sir 我今日六歲仔喇!!! 聴講話狗狗一歲等如人類七歲, 咁我咪成四十二歲, 可以同爹哋稱兄道弟?!!!

人地話夏日炎炎正好眠, 但係瓜拿大嘅夏天咁短, 梗係要用盡一分一秒玩個夠啦!

夏天終於嚟到喇, 仲一嚟就鬼死咁熱添! 屋企入面當然冷氣開放啦, 但係戶外只有天然風, 有時玩完一輪之後, 真係熱到伸晒脷呀!!!

今年多倫多嘅春天比正常冷, 五月尾都仲係時冷時暖, 攪到後園啲草種生得鬼咁慢, 都唔知道幾時先至可以重返我嘅地盤喪跑. 好彩爹哋媽咪見我悶, 日日都有得 walk 同埋出前園攤抖, 假日又有得郊遊, 日子都算過得幾愉快!

守咗兩個月行為, 終於可以假釋外出, 每日喺後園自由行廿分鐘, 真係一天都光晒. 如果當日行為良好, 總司令仲會額外開恩, 俾多廿分鐘 bonus 我添噃. 可惜一波未平, 一波又起. 最近對面街隻大黑狗 Sydney 頻頻喺後園逃走出嚟, 攪到雞飛狗走, 連 Animal Control 都驚動埋. 由於 Sydney 同我一向唔多啱咀型, 佢又試過偷襲我兩次, 所以總司令好担心, 每次帶我出街都提心吊胆, 仲要帶定縮骨遮自衛添! 唉, 希望上頭快啲俾我復職巡邏, 到時我第一時間就會緝捕 Sydney 歸案, 睇吓佢仲有冇機會也文也武! 

無自由, 失自由...雖然脊骨移位情況經已改善咗好多, 但係每個禮拜都仲要山長水遠咁去睇李小龍脊醫叔叔一次. 爹哋荷包傷之餘, 我嘅弱小心靈仲傷, 因為次次都驚一大餐, 流晒口水, 震過貓王. 希望脊骨可以喺夏天來臨之前好番晒, 咁我就可以復職巡邏, 做番威震士嘉堡嘅 Nut sir 喇!

過去呢一個月真係運滯, 喺連環拗柴之後, 竟然發現背脊有幾節骨頭移咗位. 爹哋媽咪帶咗我去睇個咩嘢脊醫, 原來係鬼佬跌打一名, 將我好似"扭計骰"咁扭嚟扭去, 攪到我震過貓王不特止, 仲流晒口水, 真係失威...原本 Nut sir 我今年嘅願望係好食好住, 不勞而獲, 不過依家只希望身體健康, 行得走得, 咁就真係一天都光晒囉!

綠色草地都變晒白茫茫, 媽咪終於番嚟喇! 睇吓我? 頭髮蓬鬆三尖八角, 睇嚟都係時候要攪一攪個形象囉!

媽咪失驚無神要番香港, 攪到十二月嘅"每月總結"要等到今日先至出, 真係遲晒大到. 唉, 媽咪唔喺度, "勞力士"爹哋又要揾食早出晚歸, 好彩 Garry 叔叔夠義氣, 每日嚟探我一兩次, 咁我先至冇悶到變化石咋!

做人切忌口多, 費事禍從口出, 誰知道狗狗口多都會惹禍上身嫁! 唉, Nut sir 我就係因為口多, 得閒無事 lam 腳仔過日晨, 攪到左腳第二隻腳趾又紅又腫, 最終要接受大懲罰 - 著鞋仔. 雖知道 Nut sir 我一向自命瀟洒, 今次俾啲街坊睇到我隻黃腫腳, 真係咩嘢架都丟晒. 所以話呢, 口痕最好食"毛脾膏"", 千祈唔好周圍 lam.

過去呢個月終於感受到秋天經已來臨. 天氣寒冷咗唔少, 有一日仲忽然之間落雪添! 十月飛霜, 唔通有咩嘢冤情?

九月廿二日秋天經已正式來臨. 瓜拿大四季分明, 秋天一到, 楓葉就會開始變色, 遲啲就會見到無數紅色, 橙色, 黃色, 甚至七彩繽紛嘅樹. 我好鐘意秋天, 因為秋高氣爽十分舒服, 行咇巡邏都唔駛仲脷索晒氣. 不過爹哋媽咪一睇到落葉就頭痛, 皆因佢地又要開始掃樹葉, 到時又唔知道要搽幾多支"萬獸倫敦"舒緩腰朘背痛囉!